78. fundur ferða- og menningarráðs Sandgerðisbæjar

var haldinn í Vörðunni fimmtudaginn 31. maí 2012 kl. 17:00.

Fundinn sátu: Helgi Haraldsson formaður S-lista, Erla Björg Rúnarsdóttir S-lista, Elín Björg Gissurardóttir D-lista og Guðjón Þ. Kristjánsson starfsmaður nefndar.

Gestur fundarins var Birgir Haraldsson deildarstjóri umhverfis- og skipulagsmála og sat hann fund við afgreiðslu mála 1, 2 og 3.

Dagskrá:

1. Ferðamannavegur.
2. Merkingar við vegi.
3. Skilti við flugstöð (1203081) – Bæjarráð.
4. Sandgerðisdagar.( – Ráðning verkefnisstjóra)
5. Jafnréttisáætlun Sandgerðisbæjar – Lagt fram.
6. Erindisbréf ferða- og menningarráðs– Lagt fram.
7. Önnur mál.

Formaður bauð fundarmenn velkomna og gerði grein fyrir dagskrá fundarins.

Formaður bauð Erlu Björg Rúnarsdóttur velkomna til starfa í ráðinu.

Gengið til dagskrár:

Dagskrá:

1. Ferðamannavegur.

Birgir Haraldsson kynnti hugmynd VSO og Vegagerðarinnar um samstarf við Sandgerðisbæ um gerð „Ferðamannavegar frá Ósabotnum til Garðskaga“. Fram kom að hugmyndin hefur verið kynnt fyrir fyrrum bæjarstjóra Sveitarfélagsins Garðs sem lýsti yfir vilja til samstarfs.

2. Merkingar við vegi.

Birgir Haraldsson lagði fram hönnun að skilti sem fyrirhugað er að setja upp í Ósabotnum við mörk Hafnarvegar nr. 46 og Garðskagavegar nr. 45 í samstarfi við verkfræðistofuna VSÓ og Vegagerðina.

Á skiltinu er getið um áhugaverða staði, þjónustu og áningarstaði á Rosmhvalanesi.

Ferða- og menningarráð fór yfir skiltið og kom með ábendingar og tillögur til úrbóta.

Birgir skýrði frá því að Menningarráð Suðurnesja hefði veitt styrk að upphæð kr. 1.000.000,- til skiltagerðar innan ferðamannavegarins. Framundan er að hanna og móta þau skilti.

3. Skilti við flugstöð (1203081) – Bæjarráð 548. fundur

Frá 548. fundi bæjarráðs.

„Auglýsingar á biðsvæði í eigu Sandgerðisbæjar á veginum við Flugstöð Leifs Eiríkssonar.

Bæjarráð ræddi málið.

Afgreiðsla: Málinu er vísað til umfjöllunar í ferða- og menningarráði með það að markmiði að skila tillögum og fjárhagsáætlun.“

Birgir skýrði frá því að gróf kostnaðaráætlun fyrir uppsetningu 10 skilta með 20 auglýsingafleti við biðsvæði á veginum við flugstöðina næmi kr. 3.000.000,-. Sandgerðisbær gæti tekið frá hluta af auglýsingaflötunum, t.d. helming þeirra og síðan selt aðgang að auglýsingaflötum sem eftir verða. Það má hugsa sér að selja flötinn á kr. 10.000,- á mánuði eða kr. 120.000,- á ári. Ef allir fletir seljast gætu tekjur orðið kr. 1.200.000,- á ári.

Ferða- og menningarráð leggur til að verkefnið verði undirbúið fyrir gerð fjárhagsáætlunar 2013.

Deildarstjóra umhverfis- og skipulagsmála verði falið að kanna burð í hlöðnum veggjum á svæðinu.

Deildarstjóra umhverfis- og skipulagsmála og ferða- og menningarfulltrúa verði falið að ræða við ISAVIA um verkið.

Jafnframt verði deildarstjóra umhverfis- og skipulagsmála og ferða- og menningarfulltrúa falið að leita styrkja til verkefnisins hjá Menningarráði Suðurnesja, Ferðamálastofu, Styrktarsjóði EBÍ og fleiri aðilum.

Þá bendir ferða- og menningarráð á að nauðsynlegt er að setja upp bekki fyrir ferðamenn á svæðinu.

4. Sandgerðisdagar. (1205032 Ráðning verkefnastjóra) Bæjarráð 551. fundur

Frá 551. fundi bæjarráðs.

„Bæjarstjóri skýrði frá því aðhún og ferða- og menningarfulltrúi hefðu rættvið Bergnýju Jónu Sævarsdóttur um að taka að sér verkefnisstjórn vegna Sandgerðisdaga 2012. Hún hefur tekið þeirri málaleitan vel.

Afgreiðsla:

Til kynningar.“

Ferða- og menningarráð fagnar ráðningu verkefnisstjóra.

Ferða- og menningarráð bendir á nauðsyn þess að koma með ferska hluti inn í bæjarhátíðina.

Ferða- og menningarráð mun boða verkefnisstjóra á sinn fund til skrafs og ráðagerða um undirbúning og framkvæmd Sandgerðisdaga.

5. Jafnréttisáætlun Sandgerðisbæjar.

Jafnréttisáætlun Sandgerðisbæjar var samþykkt í bæjarstjórn 31. janúar 2012.

Lagt fram til kynningar.

6. Erindisbréf ferða- og menningarráðs.

Erindisbréf ferða- og menningarráðs var samþykkt í bæjarstjórn 07. mars 2012.

Lagt fram til kynningar.

7. Önnur mál.

a) Guðjón skýrði frá auglýsingum Sandgerðisbæjar í félagatali Húsbílafélagsins og auglýsingaritinu „Á ferð um Ísland“.

b) Ferða- og menningarráð lýsir yfir áhyggjum sínum yfir slæmri umgengni og söfnun á rusli við sögufræga staði sem hafa fornsögulegt gildi í bæjarfélaginu. Nauðsynlegt er að hafa samband við HES og Fornleifastofnun vegna þessara mála.

c) Ferða- og menningarráð hvetur til þess að hafist verði handa við undirbúning göngustíga við Skólatjörn.

d) Ferða- og menningarráð hvetur til þess að sett verði upp leiktæki við tjaldsvæði Sandgerðisbæjar. Jafnframt verði þess gætt að hirðing og aðkoma að svæðinu verði bætt og viðhaldið.

Fleira var ekki gert og fundi slitið kl. 18:55

Fundargerð lesin og samþykkt:

Helgi Haraldsson, sign.

Erla Björg Rúnarsdóttir, sign.

Elín Björg Gissurardóttir, sign..

Guðjón Þ. Kristjánsson, sign.

Birgir Haraldsson, sign.