Vortónleikar og skólaslit Tónlistarskóla Sandgerðis fóru fram í Safnaðarheimilinu í Sandgerði fimmtudaginn 16. maí.

Athöfnin hófst með því að skólastjóri fór í stuttu máli yfir starf skólaársins, síðan tóku nemendur við og léku af sinni alkunnu snilld á hljóðfærin sín. Upphafsatriði tónleikanna var samspil allra gítarnemenda skólans, fyrir valinu var lag frá Perú, Dansa Peruviana, sem hljómaði vel í eyrum og gestir klöppuðu nemendum lof í lófa fyrir flutninginn. Dagskráin var fjölbreytt og byggðist að miklu leyti upp á samspili, í lokin stóðu allir nemendur uppi sem sigurvegarar og sannir gleðigjafar eftir frábæra frammistöðu.

Alþjóðlegur baráttudagur gegn fælni gagnvart samkynhneigðum, tvíkynhneigðum og transfólki er haldinn 17. maí ár hvert.

Af þessu tilefni er regnbogafána flaggað í dag og þannig sýndur stuðningur við mannréttindi öllum til handa og vinnu gegn fordómum og útskúfun.